Presidentja e Republikës së Kosovës, Vjosa Osmani, gjatë qëndrimit të saj në Riad, është takuar me Princin e Kurorës së Mbretërisë Hashemite të Jordanisë, Lartmadhërinë e Tij Hussein bin Abdullah al-Hashimi.
Në një postim në rrjetet sociale, Presidentja Osmani e ka cilësuar takimin si “shumë të frytshëm”, duke theksuar se Kosova dhe Jordania gëzojnë marrëdhënie të shkëlqyera bilaterale, të bazuara në miqësi, mirëbesim dhe bashkëpunim të ndërsjellë.
“Në Riad, zhvillova një takim shumë të frytshëm me Princin e Kurorës së Mbretërisë Hashemite të Jordanisë, Lartmadhërinë e Tij, Hussein bin Abdullah al-Hashimi. Kosova dhe Jordania gëzojnë marrëdhënie të shkëlqyera bilaterale, të ndërtuara mbi miqësi, mirëbesim dhe bashkëpunim të ndërsjellë,” ka shkruar Presidentja Osmani.
Sipas saj, gjatë takimit është konfirmuar gatishmëria e të dyja palëve për të thelluar partneritetin ekzistues, si dhe janë diskutuar mundësitë për hapjen e kapitujve të rinj bashkëpunimi në fusha me interes të përbashkët, përfshirë mbrojtjen, tregtinë dhe teknologjinë e informacionit (ICT).
Takimi në Riad u zhvillua në kuadër të angazhimeve ndërkombëtare të Presidentes Osmani, me qëllim forcimin e pozicionit diplomatik të Kosovës në botën arabe dhe zgjerimin e bashkëpunimit ekonomik e strategjik me vendet partnere të rajonit të Lindjes së Mesme.
