Presidentja e Republikës së Kosovës, Vjosa Osmani, mori pjesë në forumin prestigjioz “The Humboldt Speeches on Europe”, ku mbajti një fjalim frymëzues mbi rolin dhe përvojën e Kosovës në ndërtimin e paqes, demokracisë dhe qëndrueshmërisë pas luftës.
Gjatë fjalës së saj, Presidentja Osmani foli për Kosovën jo vetëm si një shtet të ri, por si një dëshmi të gjallë se besimi, qëndrueshmëria dhe forca e qytetarëve mund të ndërtojnë dritë edhe nga plagët e luftës.
“Ishte nder të flas sot në kuadër të ‘The Humboldt Speeches on Europe’, një forum prestigjioz për krerë shtetesh nga Evropa, ku fola për Kosovën tonë – jo thjesht si një shtet të ri, por si një dëshmi e gjallë se besimi, qëndrueshmëria dhe forca e qytetarëve mund të ndërtojnë dritë edhe nga plagët e luftës,” – deklaroi Osmani.
Në këtë aktivitet të mbajtur në një ndërtesë historike në zemër të Berlinit, Presidentja theksoi se Kosova sot paraqitet si një histori suksesi të demokracisë që triumfon, të vlerave që bashkojnë dhe të shpresës që e bën Evropën më të fortë, më humane dhe më të bashkuar.
🔹 Forumi “The Humboldt Speeches on Europe” është një platformë e njohur që mbledh liderë shtetesh, diplomatë dhe intelektualë evropianë, për të diskutuar mbi të ardhmen e kontinentit dhe rolin e vendeve demokratike në ndërtimin e një Evrope të qëndrueshme dhe të bashkuar.
