Kryeqyteti i Kosovës, Prishtina, është bërë qendra globale e diskutimeve për paqen, sigurinë dhe fuqizimin e grave, duke pritur edicionin e tretë të Forumit Ndërkombëtar për Gratë, Paqen dhe Sigurinë. Ky forum zhvillohet nën patronatin e Presidentes së Republikës së Kosovës, Vjosa Osmani.
Ngjarja fillon nesër, më 2 qershor, dhe do të zgjasë deri të martën, më 3 qershor. Sipas njoftimit nga Presidenca, forumi do të sjellë në Prishtinë mbi 150 folës nga më shumë se 45 vende të botës, të cilët do të marrin pjesë në mbi 30 panele diskutimi.
Tematika qendrore e këtij viti është “Kodi i Sigurisë për Brezin Tonë”, dhe për dy ditë me radhë, Prishtina do të shndërrohet në një platformë globale të ideve, përvojave dhe vizioneve për të ardhmen e sigurisë dhe barazisë gjinore.
Organizatorët theksojnë rëndësinë e forumit si një hap të rëndësishëm drejt ndërtimit të politikave gjithëpërfshirëse dhe forcimit të rolit të grave në proceset paqësore dhe të sigurisë në mbarë botën.
