Kryeqyteti i Kosovës do të mirëpresë edicionin e tretë të Forumit Ndërkombëtar për Gratë, Paqen dhe Sigurinë, i cili do të mbahet më 2 dhe 3 qershor 2025. Lajmi është bërë i ditur nga presidentja e Kosovës, Vjosa Osmani, e cila ka theksuar rëndësinë e këtij forumi si një platformë që bashkon zërat nga mbarë bota në mbështetje të paqes dhe sigurisë.
“Edicioni i tretë i Forumit Ndërkombëtar për Gratë, Paqen dhe Sigurinë përfaqëson vazhdimësinë e një angazhimi të përbashkët për paqe, siguri dhe drejtësi, të shtyrë përpara nga kampionë të guximshëm,” ka deklaruar Presidentja Osmani përmes një postimi në rrjetet sociale.
Ky forum pritet të mbledhë personalitete nga fusha të ndryshme, përfaqësues ndërkombëtarë dhe aktivistë të shquar, për të diskutuar dhe promovuar rolin thelbësor të grave në ndërtimin dhe ruajtjen e paqes në nivel global. Organizimi i këtij edicioni në Prishtinë thekson edhe një herë angazhimin e Kosovës në çështjet e sigurisë, drejtësisë dhe barazisë gjinore.
