Policia e Kosovës ka njoftuar se ka arrestuar një person në lagjen Veriu të Prishtinës, gjatë një kontrolli rutinë të zhvilluar sot nga njësitet policore të stacionit përkatës.
I dyshuari, M.S., 28 vjeç, është ndaluar nga policia, ku gjatë kontrollit i janë gjetur dhe sekuestruar një sasi e substancave të dyshuara narkotike, një shumë e konsiderueshme e parave të gatshme dhe një thikë.
Pas verifikimeve të mëtejshme, është konstatuar se ndaj tij ekzistonte edhe një urdhër aktiv kërkimi nga organet e rendit.
Me vendim të prokurorit të shtetit, ndaj të dyshuarit është shqiptuar masa e ndalimit prej 48 orësh, ndërsa ndaj tij është iniciuar procedurë penale për veprat penale: “Blerje, posedim, shpërndarje dhe shitje e paautorizuar e narkotikëve, substancave psikotrope dhe analoge”, si dhe “Armëmbajtje pa leje”.
Policia ka bërë të ditur se hetimet për rastin janë në vijim.
