Njësia për Reagim të Shpejtë e Policisë së Kosovës ka ndaluar një automjet me targa të huaja gjatë një kontrolli rutinor në Prishtinë, ku janë arrestuar dy persona – një shtetas kosovar dhe një shtetas i huaj.
Sipas njoftimit zyrtar, gjatë ndalimit të automjetit, pasagjeri – shtetasi i huaj – ka tentuar të largohet nga vendi i ngjarjes. Megjithatë, reagimi i menjëhershëm dhe profesional i policisë ka bërë të mundur ndalimin e tij.
Gjatë ndërhyrjes, i dyshuari ka rezistuar në mënyrë agresive dhe ka sulmuar zyrtarët policorë. Pas kontrollit fizik, tek ai janë gjetur dy paketime të mbështjella me pluhur të bardhë, të dyshuara si substancë narkotike e llojit kokainë, me peshë totale prej 2 kilogramë e 270.6 gramësh.
Përveç drogës, policia ka sekuestruar edhe 13,550 euro para të gatshme dhe një telefon mobil.
Në vendngjarje kanë ndërhyrë edhe zyrtarët e Drejtorisë për Hetimin e Trafikimit me Narkotikë, ndërsa është njoftuar edhe prokurori kompetent. Me urdhër të tij, është kryer kontroll në banesën e shtetasit kosovar, por nuk është gjetur material shtesë i dyshuar.
Pas përfundimit të procedurave fillestare dhe intervistimit, të dyshuarit janë dërguar në mbajtje për 48 orë, me urdhër të Prokurorisë.
