Prokuroria Themelore në Prizren, Departamenti i Krimeve të Rënda, ka ngritur aktakuzë ndaj të pandehurit F.Sh., i cili ndodhet në paraburgim që nga 9 dhjetori 2024. Ai akuzohet për veprat penale “Fajdeja” dhe “Organizimi i skemave piramidale dhe bixhozit të paligjshëm”, sipas Kodit Penal të Republikës së Kosovës.
Sipas aktakuzës, gjatë periudhës shtator 2023 – dhjetor 2024, i pandehuri ka dhënë shuma të konsiderueshme parash me interes të lartë, duke përfituar nga gjendja e rëndë financiare e viktimës A.Z.. Shumat e huazuara varionin nga 2,000€ deri në 10,000€, me norma interesi që arrinin deri në 20%. Vetëm nga këto marrëveshje fajde, viktima ka paguar 14,600€ kamatë të paligjshme dhe mbetet debitor për edhe 21,400€ të tjera, ndërsa totali i kamatës së kërkuar arrin në 81,400€.
Hetuesit thonë se më 9 dhjetor 2024, në fshatin Shirokë të Suharekës, F.Sh. u kap në flagrancë nga Policia e Kosovës duke pranuar 5,000€ nga viktima, në emër të kamatave të papaguara.
Gjithashtu, prokuroria e ngarkon të pandehurin me akuzën se gjatë periudhës janar – prill 2024 ka organizuar dhe marrë pjesë në aktivitete të bixhozit të paligjshëm, me qëllim përfitimi financiar.
Rasti pritet të dalë në gjykatë, ndërsa Prokuroria Themelore në Prizren ka paralajmëruar se do të kërkojë dënim maksimal për veprimtarinë e dyshuar kriminale të të pandehurit.
