Prokuroria Speciale e Republikës së Kosovës, nën drejtimin e Kryeprokurorit Blerim Isufaj, ka shënjestruar rastin e koduar “Mati 1” si pjesë e luftës kundër krimeve të rënda ekonomike dhe të organizuara.
Lajmi u bë i ditur pas takimit të radhës të Ekipit të Përbashkët për Përzgjedhjen dhe Shenjëstrimin e Krimeve të Rënda, ku u vendos fokusimi në këtë rast për shkak të natyrës së rëndë të veprave penale që përfshihen.
Sipas njoftimit zyrtar, rasti “Mati 1” lidhet me dyshimet për kryerjen e veprave penale si: shpëlarje parash, mashtrim, falsifikim i dokumenteve, si dhe mbajtje në pronësi, kontroll apo posedim të paautorizuar të armëve, të gjitha të parashikuara sipas dispozitave të Kodit Penal të Republikës së Kosovës.
Në kuadër të hetimeve janë përfshirë katër persona, ndërsa Prokuroria ka ndërmarrë masa për sekuestrimin dhe ngrirjen e pasurisë së dyshuar. Vlera totale e aseteve të sekuestruara arrin në 6,924,656.00 euro, që përfshin pasuri të luajtshme dhe të paluajtshme.
Në mesin e aseteve të sekuestruara janë:
-
59 banesa,
-
12 parcela në lokacione të ndryshme,
-
5 llogari bankare.
Prokuroria Speciale thekson se veprimet e tilla janë pjesë e një angazhimi të fuqishëm institucional për të luftuar krimin e organizuar dhe për të rikthyer pasuritë e fituara në mënyrë të kundërligjshme.
Hetimet në lidhje me rastin “Mati 1” janë në vazhdim e sipër.
