Protesta e thirrur nga Partia Demokratike dhe e paralajmëruar nga Sali Berisha si aksioni që do të “rrëzonte qeverinë”, përfundoi brenda më pak se tre orësh, e shoqëruar me akte të rënda dhune, molotovë, gurë dhe përplasje me policinë.
Demonstrata u zhvillua në dy akte: fillimisht para Kryeministria dhe më pas pranë Kuvendi i Shqipërisë. Bilanci zyrtar flet për 11 efektivë policie të lënduar dhe 22 protestues të shoqëruar.
Masa të shtuara sigurie dhe molotovë
Për shkak të thirrjeve dhe gjuhës së ashpër të ditëve të fundit, forcat e rendit kishin marrë masa të shtuara sigurie. Kordoni i parë para Kryeministrisë përbëhej nga forca speciale me skafandra, ndërsa efektivë u pozicionuan edhe në tarracat e godinave përreth.
Rreth orës 17:23, Berisha u nis nga selia e PD-së drejt bulevardit, i shoqëruar nga Flamur Noka dhe Gazment Bardhi. Sipas pamjeve ajrore, pjesëmarrja u dominua nga militantë të organizuar nga rrethe të ndryshme të vendit.
Pas fjalimit të Berishës, që zgjati më pak se 20 minuta, situata agravoi. Molotovë u hodhën drejt Kryeministrisë, duke përfshirë në flakë shkallët hyrëse dhe duke rrezikuar jetën e efektivëve. Aksioni zgjati rreth 4 minuta, për t’u shuar më pas nga autobotët e ujit dhe gazi lotsjellës i policisë.
Zhvendosje te Kuvendi dhe përplasje të reja
Pas ndërhyrjes së policisë, organizatorët njoftuan protestuesit të zhvendoseshin drejt Kuvendit. Vetë Berisha u largua nga protesta dhe u kthye në selinë e PD-së.
Pranë Kuvendit, në krye të protestuesve u panë Flamur Noka, Klevis Balliu dhe Luçiano Boçi. Tentativa për të çarë kordonin policor dështoi menjëherë, ndërsa u shënuan hedhje gurësh dhe përplasje sporadike me policinë. Situata u vu nën kontroll pas mbërritjes së autobotëve të policisë, duke shpërndarë turmën.
Reagimi i Berishës
Në përfundim, Berisha akuzoi kryeministrin Edi Rama për provokim dhe kërkoi lirimin e protestuesve të shoqëruar, duke i cilësuar ata si “paqësorë”.
Protesta, e shpallur si vendimtare nga opozita, u mbyll pa arritur objektivat e shpallura, por la pas tensione të forta politike, të lënduar dhe dëme materiale, duke rritur më tej klimën e përplasjes mes opozitës dhe qeverisë.
