Përgatitjet për hapjen e festivalit ndërkombëtar të xhazit “Mitrovica International Jazz Days” u shoqëruan me tensione në qendër të Mitrovicës së Veriut, ku një grup qytetarësh serbë protestuan pranë skenës ku pritej të mbahej nata e parë e festivalit.
Sipas pamjeve të publikuara nga mediumi serb “Alternativna”, grupi i protestuesve, të vendosur në një kafene me shpinë nga skena, filluan të brohorasin dhe fishkëllenin në shenjë pakënaqësie, sidomos në momentin kur në vendngjarje mbërriti kryetari i komunës së Mitrovicës së Veriut, Erden Atiq. Protestuesit u dëgjuan gjithashtu duke lëshuar ofendime në drejtim të organizatorëve dhe autoriteteve komunale.
Festivali “Mitrovica International Jazz Days” është në edicionin e tij të tretë. Ndryshe nga dy vitet e kaluara, kur koncertet u zhvilluan vetëm në Parkun e Qytetit në Mitrovicën e Jugut, këtë vit organizatorët kanë vendosur që një nga netët, konkretisht ajo hapëse, të mbahet në qendër të Mitrovicës së Veriut. Sipas “Radio Mitrovica e Veriut”, festivali do të zgjasë nga 8 deri më 10 gusht, me natën e parë në veri dhe dy netët e tjera në jug të qytetit.
Organizatorët nuk kanë komentuar ende në lidhje me incidentin, ndërsa policia ka qenë e pranishme në vendin e ngjarjes për të garantuar sigurinë. Pavarësisht tensioneve, festivali pritet të vazhdojë sipas agjendës së parashikuar.
