Në parkingun e Pallatit të Rinisë në Prishtinë kanë nisur të mbërrijnë autobusët e parë me protestues nga qytete të ndryshme të vendit, të cilët do t’i bashkohen protestës kundër padrejtësive që pretendohet se po ndodhin ndaj ish-krerëve të UÇK-së në Hagë.
Deri më tani, janë raportuar të kenë arritur 14 autobusë, me protestues nga Gjilani, Peja, Prizreni, Istogu dhe Theranda (Suhareka).
Tubimi është organizuar në shenjë solidariteti me të akuzuarit në Dhomat e Specializuara në Hagë, me kërkesa për drejtësi dhe trajtim të barabartë për ish-udhëheqësit e luftës së UÇK-së.
Protestuesit pritet të marshojnë në qendër të Prishtinës, ndërkohë që organizatorët kanë theksuar se protesta do të zhvillohet në mënyrë paqësore. Autoritetet kanë njoftuar për praninë e shtuar të policisë për të garantuar mbarëvajtjen e protestës dhe sigurinë publike.
