Në protestën e sotme të organizuar në kryeqytet nga Organizata e Veteranëve të Luftës së UÇK-së (OVL-UÇK), në mbështetje të ish-krerëve të UÇK-së që po përballen me drejtësinë në Hagë, janë parë bashkë shumë prej figurave të njohura të luftës dhe të pasluftës.
Mes qindra qytetarëve, afër njëri-tjetrit u vunë re Ramiz Lladrovci, Latif Gashi, Sami Lushtaku dhe Rrustem Mustafa – Remi, të gjithë ish-komandantë të dalluar të Ushtrisë Çlirimtare të Kosovës. Prania e tyre jo vetëm që dha një mesazh të qartë për unitetin e luftëtarëve të lirisë, por shërbeu edhe si dëshmi e vazhdimësisë së mbështetjes ndaj bashkëluftëtarëve që ndodhen në paraburgim në Hagë.
“Drejtësia për luftëtarët e lirisë nuk mund të jetë drejtësi selektive. Ata nuk ishin kriminelë, por çlirimtarë,” u tha në fjalimet dhe pankartat që u panë në protestë.
Të katër figurat kyçe – Lladrovci, Gashi, Lushtaku dhe Mustafa – kanë qenë të përfshirë drejtpërdrejt në rezistencën e armatosur gjatë viteve të luftës dhe janë ndër emrat më të njohur për bazat e tyre në zonat operative të UÇK-së. Pjesëmarrja e tyre në protestë u prit me duartrokitje nga qytetarët e mbledhur, të cilët shprehën solidaritet të palëkundur për të akuzuarit në Hagë.
Protesta kaloi në atmosferë të qetë dhe të organizuar, ndërsa organizatorët paralajmëruan vazhdim të mobilizimit qytetar deri në përfundimin e gjykimit. Mesazhi i ditës: Liria nuk është krim – UÇK është krenari.
