Në sheshin “Skënderbeu” në Shkup, mijëra qytetarë nga gjithë rajoni u bashkuan sot në protestën e organizuar nga Organizata e Veteranëve të Luftës së UÇK-së, në mbështetje të ish-krerëve të Ushtrisë Çlirimtare të Kosovës që po gjykohen në Hagë.
Protesta, e cila zgjati rreth një orë, solli pranë njëri-tjetrit qytetarë, aktivistë dhe figura të shumta politike, përfshirë Ali Ahmetin nga BDI-ja, Vlorë Çitakun, Ganimete Musliun nga PDK, Daut Haradinajn nga AAK dhe Fatmir Limajn e Nismës. Pankarta gjigante e vendosur në shesh mbante mesazhin e drejtpërdrejtë: “Çlirimtarët duhet të nderohen, jo të gjykohen.”
Gucati: “UÇK-ja ka mbrojtur vendin, jo krime”
Kryetari i OVL-UÇK-së, Hysni Gucati, në fjalën e tij u shpreh i ashpër ndaj akuzave që rëndojnë mbi ish-komandantët.
“Sot jemi këtu për t’i treguar ambasadave të huaja në Shkup se UÇK-ja nuk ka qenë ushtri kriminale. Ajo ka qenë ushtri çlirimtare që mbrojti vendin e vet. Kjo gjykatë u formua mbi trillime të një njeriu të çmendur që në vitin 2011 akuzoi pa prova,” — deklaroi Gucati.
Ahmeti: Falenderim për aleatët perëndimorë
Në një fjalim të ngrohtë dhe emocional, kryetari i BDI-së, Ali Ahmeti, shprehu mirënjohjen për Shtetet e Bashkuara, Evropën dhe NATO-n:
“Amerikë, NATO, Evropë – faleminderit! Ju keni mbështetur filozofinë dhe sakrificën e njerëzve tanë më të mëdhenj përmes UÇK-së, duke ndalur gjenocidin e Serbisë ndaj shqiptarëve të Kosovës.”
Ahmeti theksoi se lufta e UÇK-së ishte e drejtë, humanitare dhe mbështetur ndërkombëtarisht.
Protesta e pestë me radhë në mbrojtje të ish-komandantëve
Kjo është protesta e pestë e mbajtur këtë vit në mbështetje të ish-krerëve të UÇK-së. Para Shkupit, protesta të mëdha janë zhvilluar në Prishtinë, Hagë, Tiranë dhe së fundmi në Strasbourg, duke krijuar një front rajonal solidariteti.
Gjykimi në Hagë drejt fundit
Hashim Thaçi, Kadri Veseli, Jakup Krasniqi dhe Rexhep Selimi – të gjithë ish-drejtues të Shtabit të Përgjithshëm të UÇK-së – po gjykohen në Hagë për krime lufte dhe krime kundër njerëzimit.
Aktakuza përfshin akuza për burgosje të paligjshme, torturë, vrasje, zhdukje me forcë dhe persekutim të civilëve gjatë viteve 1998–1999, si në Kosovë, ashtu edhe në veri të Shqipërisë. Të katër i kanë mohuar kategorikisht akuzat.
Gjykimi pritet të përmbyllet në fillim të vitit 2026, duke lënë ende të hapur një kapitull të rëndë historik që ka tronditur skenën politike dhe shoqërore të Kosovës.
