Pika kufitare në Jarinjë pritet të bllokohet sot për rreth dy orë, për shkak të një proteste të paralajmëruar në anën e territorit të Serbisë.
Sipas njoftimit të Ministria e Punëve të Brendshme e Kosovës dhe Qendra Kombëtare për Menaxhim Kufitar, rruga në këtë pikë kufitare do të jetë e bllokuar nga ora 16:00 deri në 18:00.
Autoritetet u kanë bërë thirrje qytetarëve që të shmangin qarkullimin përmes kësaj pike kufitare dhe të përdorin pika të tjera kalimi.
Protestë kundër ligjeve të reja
Protesta është paralajmëruar nga një grup të rinjsh serbë në prag të zbatimit të Ligjit për të Huajt dhe Ligjit për Automjetet në Kosovë, të cilat ata i kundërshtojnë.
Sipas organizatorëve, protesta do të nisë simbolikisht në orën 12:44 në parkun e qytetit në Rashkë, për të vazhduar më pas me një marshim protestues nga Rashka drejt Jarinjës dhe me bllokimin e pikës kufitare për dy orë.
Organizatorët kanë deklaruar se këto ligje, sipas tyre, “janë të drejtuara drejtpërdrejt kundër popullit serb që jeton në Kosovë”.
Vizita e Sorensen në Prishtinë
Protesta zhvillohet në një moment kur në Prishtinë ndodhet i dërguari i Bashkimi Evropian për dialogun Kosovë–Serbi, Peter Sorensen, i cili pritet të zhvillojë takim me kryeministrin Albin Kurti për çështjet që lidhen me zbatimin e këtyre ligjeve.
Për informata shtesë lidhur me situatën në pikën kufitare, Qendra Kombëtare për Menaxhim Kufitar ka vënë në dispozicion numrat kontaktues:
-
+383 (0)45 198 000
-
+383 (0)45 198 606
-
numri pa pagesë: 0800 50095.
