Presidenti i Federatës Ruse, Vladimir Putin, ka deklaruar se Rusia deri më tani nuk ka parë nevojë për të përdorur armë bërthamore në luftën në Ukrainë, dhe shpreson që kjo të mos ndodhë as në të ardhmen.
“Deri më tani nuk ka pasur nevojë për të përdorur armë bërthamore dhe shpresoj se nuk do të ketë asnjëherë,” – tha Putin në një intervistë të paralajmëruar për televizionin shtetëror rus.
Deklarata u bë publike në një trailer të intervistës që do të transmetohet përpara 80-vjetorit të fitores ndaj fashizmit, i cili do të shënohet me një paradë të madhe ushtarake më 9 maj në Moskë.
Putin theksoi se Rusia ka “forcë të mjaftueshme për ta çuar luftën në Ukrainë drejt një përfundimi logjik, me rezultatin që kërkon Moska.” Ai përsëriti qëndrimin se, megjithë frikën ndërkombëtare për një përshkallëzim bërthamor, një vendim i tillë nuk është marrë dhe se një skenar i tillë mbetet i padëshirueshëm.
Frika për një konflikt bërthamor ka qenë prezente që nga pushtimi rus i Ukrainës në shkurt të vitit 2022. Ish-drejtori i CIA-s, William Burns, pati paralajmëruar në fund të atij viti se ekzistonte një mundësi reale që Rusia të përdorte armë bërthamore kundër Ukrainës.
Rusia ka shpallur një armëpushim të përkohshëm nga data 8 deri më 10 maj, me rastin e përvjetorit të fitores në Luftën e Dytë Botërore.
Megjithatë, presidenti ukrainas Volodymyr Zelensky e ka kundërshtuar këtë propozim, duke kërkuar një armëpushim të plotë prej së paku 30 ditësh. Ai theksoi se Rusia duhet të garantojë sigurinë e qytetarëve që do të marrin pjesë në paradë.
Ndërkohë, Presidenti kinez Xi Jinping pritet të vizitojë Rusinë gjatë datave 7-10 maj dhe do të marrë pjesë në ceremoninë ushtarake në Moskë, sipas njoftimit të Kremlinit. I ftuar në paradë është edhe Presidenti i Serbisë, Aleksandar Vuçiç, ndonëse Brukseli ka paralajmëruar liderët e vendeve evropiane që ruajnë afërsi me Kremlinin se pjesëmarrja në këtë ngjarje do të kishte pasoja politike.
Vuçiç, i cili u kthye para kohe nga një vizitë në SHBA për shkak të dhimbjeve të forta në gjoks, ka ngjallur spekulime në media nëse gjendja shëndetësore është edhe një arsyetim për të shmangur pjesëmarrjen në paradën në Moskë.
Në të njëjtën kohë, raportohet se edhe kryeministri sllovak Robert Fico është prekur nga probleme shëndetësore, duke rritur spekulimet rreth pjesëmarrjes së liderëve të caktuar në këtë ngjarje me rëndësi të lartë simbolike për Rusinë.
