Paneli Zgjedhor për Ankesa dhe Parashtresa ka aprovuar ankesën e Listës Serbe kundër vendimit të Komisionit Qendror të Zgjedhjeve (KQZ) për mosshpalljen e rezultatit përfundimtar të zgjedhjeve parlamentare të 28 dhjetorit 2025 për këtë subjekt politik dhe kandidatët e tij.
Në vendimin e publikuar, PZAP ka vlerësuar se ankesa e Listës Serbe është e bazuar, duke theksuar se vendimi i KQZ-së është i pajustifikuar dhe në kundërshtim të plotë me dispozitat ligjore në fuqi.
“Një qëndrim i tillë nuk mund të pranohet si i drejtë dhe i ligjshëm, pasi është në kundërshtim me nenet 101, 106 dhe 111 të Ligjit për Zgjedhjet e Përgjithshme, si dhe me Rregulloren Zgjedhore për Rezultatet Zgjedhore”, thuhet në arsyetimin e PZAP-së.
Paneli ka theksuar se, duke qenë se të gjitha procedurat e numërimit dhe rinumërimit kanë përfunduar për të gjitha subjektet politike, rezultati përfundimtar duhet të shpallet menjëherë dhe pa përjashtim të asnjë subjekti zgjedhor.
Sipas PZAP-së, shpallja e pjesshme e rezultateve nuk ka bazë ligjore, bie ndesh me parimet e barazisë së subjekteve zgjedhore, sigurisë juridike dhe transparencës, si dhe është në kundërshtim me standardet e Komisionit të Venecias.
Palët e përfshira kanë të drejtë ankese ndaj këtij vendimi brenda afatit 48-orësh në Gjykata Supreme.
Sfondi i rastit
Më 31 janar, KQZ shpalli rezultatet përfundimtare të zgjedhjeve të parakohshme parlamentare, por pa përfshirë Listën Serbe, pasi gjatë mbledhjes dy anëtarë të KQZ-së nga Lëvizja Vetëvendosje votuan kundër, ndërsa anëtarët e tjerë abstenuan.
Ky vendim u kritikua edhe nga përfaqësues ndërkombëtarë, të cilët shprehën shqetësim për respektimin e standardeve zgjedhore.
Ndërkohë, PZAP ka refuzuar si të pabazuara gjashtë ankesa të tjera, përfshirë dy ankesa të kandidatit të PDK-së, Bekim Haxhiu.
