Paneli Zgjedhor për Ankesa dhe Parashtresa (PZAP) ka marrë një vendim në favor të subjektit politik Lista Serbe, duke aprovuar ankesën e saj kundër moscertifikimit të kandidatëve nga Komisioni Qendror i Zgjedhjeve (KQZ).
KQZ kishte refuzuar më 21 gusht të certifikonte listën e kandidatëve të Listës Serbe për zgjedhjet lokale të 12 tetorit 2025, duke argumentuar se disa prej tyre nuk i plotësonin kriteret ligjore të përcaktuara me nenin 29 të Ligjit për Zgjedhjet e Përgjithshme.
Megjithatë, sipas arsyetimit të PZAP, vendimi i KQZ-së nuk ka qenë i mbështetur në mënyrë të mjaftueshme në ligj dhe nuk është dëshmuar bindshëm që kandidatët në fjalë ishin në kundërshtim me dispozitat ligjore.
Në përfundim, PZAP i ka kërkuar KQZ-së që të certifikojë listën e kandidatëve të Listës Serbe në të gjitha komunat ku subjekti ka aplikuar për të marrë pjesë në zgjedhjet e ardhshme lokale. Ky vendim hap rrugën për pjesëmarrjen e Listës Serbe në garën zgjedhore të 12 tetorit.
