Federata e Çiklizmit e Kosovës ka njoftuar se më 20 dhe 21 qershor 2025 do të organizojë gara çiklistike, të cilat do të sjellin bllokim të përkohshëm të qarkullimit për automjete në disa akse rrugore kryesore të vendit.
Sipas njoftimit zyrtar, bllokimet do të prekin autostradën “Arbën Xhaferi”, rrugën nacionale N9 dhe autostradën “Ibrahim Rugova”, në kohë dhe segmente të ndryshme, si më poshtë:
-
Më 20 qershor 2025 (e premte), nga ora 10:00 deri në 14:00, do të mbyllet përkohësisht autostrada “Arbën Xhaferi”, në drejtimin Prishtinë – Hani i Elezit, konkretisht segmenti nga hyrja/dalja Lipjan deri tek hyrja/dalja Bibaj.
-
Më 21 qershor 2025 (e shtunë), nga ora 09:00 deri në 16:00, gara do të zhvillohet në relacionin:
Autostrada “Arbën Xhaferi” (hyrja/dalja Bibaj) – Babush – Lipjan – Prishtinë (Uglar) – Bresje – Rruga nacionale N9 deri në Gjergjicë – Autostrada “Ibrahim Rugova” – Malishevë – Duhel, dhe në kthim në të njëjtin drejtim.
Policia e Kosovës ka paralajmëruar se do të jetë e pranishme me një plan të detajuar për menaxhimin e sigurisë rrugore dhe për orientimin e trafikut gjatë zhvillimit të garave. Po ashtu, autoritetet policore u bëjnë thirrje të gjithë pjesëmarrësve në trafik që të tregojnë mirëkuptim dhe të shfrytëzojnë rrugët alternative, për të shmangur pritjet dhe vonesat.
Garat janë pjesë e aktiviteteve sportive të planifikuara në kuadër të kalendarit të Federatës së Çiklizmit dhe pritet të tërheqin vëmendje të konsiderueshme nga sportdashësit dhe qytetarët.
