Qeveria në detyrë e Republikës së Kosovës ka zhvilluar sot një mbledhje elektronike, ku janë marrë disa vendime të rëndësishme në fushën e arsimit, shëndetësisë, bujqësisë dhe infrastrukturës.
Në këtë mbledhje, është vendosur që mandati i Komisionit për Verifikimin e Diplomave të lëshuara nga Universiteti i Mitrovicës së Veriut të vazhdohet deri më 15 tetor 2025. Po ashtu, u miratuan ndryshimet dhe plotësimet në Statutin Nr. 01/2023 të Shërbimit Spitalor dhe Klinik Universitar të Kosovës.
Ministria e Bujqësisë, Pylltarisë dhe Zhvillimit Rural mori miratim për rialokim të mjeteve buxhetore në vlerë prej 105,000 euro, për ndërtimin e zyrave rajonale të Inspektoratit të AUV-it në Ferizaj dhe Gjakovë.
Ndërkohë, Ministria e Mjedisit, Planifikimit Hapësinor dhe Infrastrukturës siguroi rritjen e kufirit të shpenzimeve në shumën prej 580,780 euro dhe ndarjen e mjeteve në shumë prej 372,100 euro për projektin e Kadastrit të patundshmërisë dhe infrastrukturës gjeohapësinore.
