Këshilli i Ministrave pritet të mblidhet sot në orën 12:00 për të marrë vendimin përfundimtar mbi shkarkimin e Erion Veliajt nga detyra e kryebashkiakut të Tiranës. Vendimi pason propozimin e miratuar një ditë më parë nga Këshilli Bashkiak dhe të përcjellë nga Prefekti i Tiranës.
Këshilli Bashkiak miratoi me 50 vota pro kërkesën e këshilltarëve socialistë, të mbështetur edhe nga opozita dhe Endri Shabani, duke e bërë të detyrueshme shqyrtimin nga qeveria. Veliaj ka kundërshtuar procedurën dhe ka lënë të kuptohet se mund të ankimojë në Gjykatën Kushtetuese. Nëse ankimi bëhet brenda 15 ditësh, vendimi i qeverisë pezullohet, duke shtyrë edhe zgjedhjet në kryeqytet.
Megjithatë, kryeministri Edi Rama ka deklaruar se procesi do të ecë përpara. Në një takim me kabinetin dhe deputetët e qarkut të Tiranës, Rama e quajti shkarkimin e Veliajt “të detyrueshëm”, duke theksuar se “Tirana nuk mund të gdhihet dhe ngryset si trup pa kokë”.
Më herët, Rama zhvilloi një takim dyorësh në Kryeministri me nënkryetarët e Bashkisë së Tiranës, kryetaren e komanduar Anuela Ristani, si dhe me kandidaten socialiste për kryebashkiake, Ogerta Manastirliu.
Veliaj ndodhet në burg që nga 10 shkurti, ndërsa SPAK e ka çuar në gjyq me 13 akuza, prej të cilave 9 për korrupsion. Ai ka drejtuar Bashkinë e Tiranës për mbi 10 vite, nga viti 2015 deri më sot.
