Organizata e Veteranëve të Luftës së UÇK-së ka reaguar publikisht pas tubimit të mbajtur sot, ku mijëra qytetarë iu bashkuan thirrjes për të kundërshtuar padrejtësitë ndaj kategorive të dala nga lufta.
Në një postim të shpërndarë në faqen zyrtare në Facebook, OVL-UÇK u shpreh thellësisht mirënjohëse ndaj qytetarëve që, siç theksohet, “folën me zemër të jashtëzakonshme”.
“Jemi pa fjalë. Sot folët ju, qytetarë të zakonshëm me zemër të jashtëzakonshme. Faleminderit për madhështinë tuaj!”, thuhet në reagimin e organizatës.
Falënderim të veçantë iu drejtua edhe mediave, të cilat “e bënë zërin tonë të padëgjuar të dëgjohet kudo”, duke reflektuar jehonën e gjerë që pati protesta në opinionin publik.
Postimi përfundon me një mesazh simbolik e mobilizues: “Kur populli ngrihet, padrejtësia nuk kalon dot”, duke i dhënë kështu edhe një ton të qartë qëndrueshmërisë së kërkesave të tyre.
Ky mobilizim qytetar vjen në një periudhë kur zërat për mbrojtjen e dinjitetit të veteranëve të UÇK-së janë shtuar ndjeshëm, duke shënuar një momentum të ri në debatet sociale dhe politike në vend.
