Edi Rama mbajti një fjalim historik në Knesset, parlamentin e Izraelit, ku theksoi rolin unik të Shqipërisë dhe shqiptarëve në mbrojtjen e hebrenjve gjatë Luftës së Dytë Botërore, si dhe qëndrimin e Tiranës zyrtare për paqen në Lindjen e Mesme.
Kryeministri shqiptar ishte i ftuar nderi në seancën plenare dhe u prit bashkë me bashkëshorten e tij nga kryetari i Knessetit, Amir Ohana, në prani të krerëve më të lartë të shtetit izraelit.
“Mund të merrni floririn, por jo hebrenjtë”
Në fjalimin e tij, Rama u kthye pas në kohë duke kujtuar Besën shqiptare dhe refuzimin historik për t’i dorëzuar hebrenjtë gjatë Holokaustit.
“Gjatë Holokaustit, kur nazistët erdhën për t’i marrë hebrenjtë, shqiptarët thanë: mund të merrni floririn, por jo hebrenjtë. Kjo nuk është legjendë, kjo është Shqipëria”, tha Rama, duke theksuar se Shqipëria është i vetmi vend në Europë që doli nga Lufta e Dytë Botërore me më shumë hebrenj sesa kishte para saj.
Ai njoftoi gjithashtu hapjen e një muzeu në Vlorë kushtuar shpëtimit të hebrenjve nga shqiptarët.
Falënderime nga krerët izraelitë
Kontributi i shqiptarëve u vlerësua nga udhëheqësit më të lartë të Izraelit.
Benjamin Netanyahu theksoi se Shqipëria ishte “ishull paqeje në oqeanin e së keqes”, duke vlerësuar sakrificën e shqiptarëve që rrezikuan jetën për të shpëtuar hebrenjtë.
Ndërsa lideri i opozitës, Yair Lapid, tha se “kur Europa i dorëzonte hebrenjtë, shqiptarët i mbrojtën ata sepse besonin në moralin njerëzor dhe në Besë”.
Kryetari i Knessetit, Amir Ohana, u shpreh:
“Duke qëndruar krah Izraelit, Shqipëria mbron vlerat e civilizimit kundër barbarisë. Faleminderit për Besën”.
Qëndrimi për Gazën dhe Hamasin
Duke folur si përfaqësues i Shqipërisë në Bordin e Paqes, Rama u shpreh se nuk mund të ketë paqe të qëndrueshme në Rripin e Gazës pa çarmatosjen dhe çmontimin e Hamasit.
“Derisa Hamasi të çarmatoset, asnjë paqe nuk mund të zgjasë. Tunelët e Hamasit, ku u vranë dhe u torturuan pengje izraelite, duhet të ruhen si dëshmi për brezat e ardhshëm”, tha ai.
Rama theksoi se Shqipëria, si vend themelues i Bordit të Paqes, synon të kontribuojë në një dritare të re mundësish për paqe në rajon.
Mesazh për paqe dhe dinjitet
Në përmbyllje, kryeministri shqiptar u bëri thirrje si izraelitëve ashtu edhe palestinezëve të ecin drejt një rruge paqeje dhe dinjiteti.
“Palestinezët le të jetojnë me dinjitet në vendin e tyre. Dy popujt le të jenë bashkë për njerëzimin dhe paqen”, përfundoi Rama.
