Kryeministri i Shqipërisë, Edi Rama, ndodhet në Paris me ftesë të presidentit francez Emmanuel Macron, për të marrë pjesë në Forumin e Paqes, një nismë e rëndësishme diplomatike e zhvilluar nën kujdesin e vetë Kreut të Elizesë.
Sipas agjendës zyrtare, Rama pritet të zhvillojë një takim kokë më kokë me Macron në mbrëmjen e sotme, në kuadër të diskutimeve dypalëshe për bashkëpunimin rajonal, procesin e integrimit evropian dhe çështjet aktuale të sigurisë në Ballkanin Perëndimor.
Më herët gjatë ditës, kryeministri shqiptar mori pjesë në një bashkëbisedim me Gilles Gressani, drejtorin e revistës prestigjioze “Le Grand Continent”, me temë:
“Diplomacia në një botë të ndarë: Lidershipi rajonal dhe e ardhmja e multilateralizmit.”
Në vijim, Rama mori pjesë edhe në një sesion të Forumit të Paqes, ku ishte i pranishëm edhe presidenti Macron dhe disa liderë të tjerë botërorë, ku u trajtuan sfidat e rendit ndërkombëtar dhe roli i bashkëpunimit rajonal në ruajtjen e stabilitetit global.
Forumi i Paqes në Paris ka mbledhur këtë vit përfaqësues të qeverive, institucioneve ndërkombëtare dhe organizatave globale, me synim forcimin e dialogut dhe diplomacisë në një periudhë të trazuar për botën.
