Kryeministri i Shqipërisë, Edi Rama, ka ndarë pamje nga vizita zyrtare në Abu Dhabi, duke e cilësuar mikpritjen nga presidenti i Emirateve të Bashkuara Arabe si të paharrueshme dhe duke theksuar se gjatë takimeve janë vendosur piketa të reja të një bashkëpunimi kuptimplotë që po forcohet dita-ditës mes dy vendeve.
Përmes një postimi në rrjetet sociale, Rama shkroi se vizita shënoi një hap të rëndësishëm në thellimin e marrëdhënieve dypalëshe. “Mirëmëngjes dhe me fotoalbumin e një mikpritjeje të paharrueshme në Emiratet e Bashkuara, ku vendosëm piketa të reja të bashkëpunimit kuptimplotë që po forcohet dita-ditës, ju uroj një ditë të mbarë”, shkroi ai.
Gjatë qëndrimit në Abu Dhabi, Kryeministri Rama u nderua nga presidenti Mohamed bin Zayed Al Nahyan me Urdhrin e Zayed, dekoratën më të lartë civile të Emirateve të Bashkuara Arabe. Kjo dekoratë iu akordua në vlerësim të kontributit të tij për forcimin e bashkëpunimit politik, ekonomik dhe strategjik mes Shqipërisë dhe Emirateve.
Po ashtu, Rama mori pjesë në panelin e Samitit të Javës së Zhvillimit të Qëndrueshëm, ku foli për ambicien e Shqipërisë për të eksportuar energji të gjelbër në Evropë, si dhe për përdorimin e Inteligjencës Artificiale në prokurimet publike, me synimin për të reduktuar sa më shumë ndërhyrjen njerëzore dhe për të rritur transparencën.
Vizita në Emiratet e Bashkuara Arabe konfirmon intensifikimin e marrëdhënieve mes dy vendeve dhe hap perspektiva të reja bashkëpunimi në fusha kyçe si energjia, teknologjia dhe zhvillimi i qëndrueshëm.
