Kryeministri Edi Rama ka dhënë një sërë mesazhesh të forta për median lidhur me vizionin “Shqipëria 2030” dhe sfidat që e shoqërojnë këtë rrugë drejt integrimit evropian, me theks të veçantë në performancën e pushtetit vendor dhe respektimin e hapësirave publike.
Në një prononcim për shtypin nga Tirana, kreu i qeverisë nënvizoi se zhvillimi i qëndrueshëm urban dhe administrimi efikas i hapësirave publike janë elementë kyç për përmirësimin e cilësisë së jetës në vend, si dhe për përmbushjen e standardeve evropiane.
“Hapësirat publike nuk janë vetëm zbukurim urban, por indikatorë të drejtësisë sociale dhe pjesë e pandashme e projektit kombëtar ‘Shqipëria 2030’. Pushteti vendor ka një rol të pazëvendësueshëm në këtë proces,” – deklaroi Rama.
Vepër penale çdo tentativë për privatizim të hapësirave publike
Rama adresoi me tone të ashpra abuzimet me hapësirat publike, duke theksuar se çdo formë uzurpimi apo zaptimi të ambienteve të përbashkëta, si vendosja e traëve me pagesë në lagje, përbën vepër penale.
“Nëse dikush vendos një tra për të marrë para nga banorët e një lagjeje, ai kryen vepër penale. Askush nuk ka të drejtë të privatizojë jetën publike të komunitetit,” – theksoi Kryeministri.
Ai shtoi se çdo ndërtim jashtë trupit të pallatit, edhe pse në marrëveshje me ndërtuesin, konsiderohet pronë publike dhe nuk mund të pretendohet si pronë private pas ndërtimit.
Ndërtimet pa leje, konfiskim i plotë
Kryeministri deklaroi se shkeljet e lejeve të ndërtimit nuk do të tolerohen më. Ai bëri të qartë se nuk do të ketë konfiskim të pjesshëm, por të plotë të ndërtesave ku evidentohen abuzime me kate shtesë.
“Ndërtimi i kateve shtesë për qëllim fitimi është shkelje me vetëdije. Nuk do lejojmë që kjo të mbulohet me letra. Ndërtesat do sekuestrohen tërësisht dhe do kalojnë në pronësi të shtetit për të strehuar njerëz në nevojë,” – deklaroi Rama.
Legalizimi vetëm për ndërtime para 2020-s
Kryeministri rikujtoi se procesi i legalizimit vlen vetëm për objektet e ndërtuara para vitit 2020. Ndërtimet pas këtij viti nuk përfitojnë legalizim, pavarësisht vetëdeklarimeve.
“Nuk do legalizojmë mashtrimin. Nuk është diskutim për familjet që kanë futur kokën në një banesë, por për abuzues që ndërtojnë për fitim dhe përpiqen të kamuflojnë shkeljet me letra false,” – theksoi ai.
Listë e zezë për ndërtuesit abuzivë
Qeveria, sipas Ramës, do miratojë një listë të zezë për ndërtuesit që abuzojnë me territorin dhe shkelin ligjet urbanistike. Këta individë do të përjashtohen nga çdo mundësi për të marrë leje ndërtimi në të ardhmen.
“Kush futet në listën e zezë, humbet çdo të drejtë për të ndërtuar. Do penalizojmë edhe ata që shesin apartamente disa herë apo i lënë qytetarët pa dokumente pronësie. U bëj thirrje të zgjidhin problemet tani, sepse do përballen me pasoja të rënda,” – paralajmëroi Rama.
Konfiskim i ndërtimeve të braktisura që nga vitet ’90
Në fund, Rama njoftoi edhe një nismë të re për të konfiskuar të gjitha ndërtimet dhe ngrehinat e braktisura që datojnë që nga vitet ’90, të cilat sipas tij, janë kthyer në burim rreziku për shëndetin publik dhe mjedisin.
“Nuk mund të lejojmë më që karakatinat e ndërtuara dhe lëna rrugëve të cenojnë shëndetin dhe sigurinë e komunitetit. Do konfiskohen dhe do rikthehen në funksion të qytetarëve,” – përfundoi ai.
Këto masa vijnë si pjesë e reformës së gjerë të qeverisë për garantimin e një zhvillimi të qëndrueshëm, barazie në qasjen ndaj hapësirës publike dhe shtetndërtimit të bazuar mbi rendin ligjor – objektiva të shpallura të vizionit “Shqipëria 2030” dhe integrimit në Bashkimin Europian.
