Kryeministri i Shqipërisë, Edi Rama, ka prezantuar një paketë të re reformash që synojnë rritjen e pagave dhe përmirësimin e skemës së pensioneve, duke e lidhur drejtpërdrejt me përballimin e inflacionit.
Duke folur në podkastin “Flasim”, Rama theksoi se paga minimale në vend ka arritur në 500 euro nga 1 janari 2026, ndërsa paga mesatare është rritur me rreth 10% si në sektorin publik ashtu edhe në atë privat.
Ai nënvizoi se fokusi i politikave të reja nuk është vetëm rritja e pagave, por edhe mbrojtja e fuqisë blerëse përballë rritjes së çmimeve. Sipas tij, qeveria do të aplikojë indeksimin e pagave çdo dy vite në sektorin publik, me masa shtesë për kategori të ndjeshme si mësuesit, mjekët, infermierët, policët dhe ushtarakët.
Në sektorin shëndetësor, nga muaji qershor pritet rritje konkrete e pagave, ku mjekët do të përfitojnë deri në 18 mijë lekë shtesë në muaj, ndërsa infermierët dhe teknikët rreth 12 mijë lekë, të shoqëruara me pagesa më të larta për turnet dhe vlerësim të përvojës.
Sa i përket pensioneve, Rama prezantoi një skemë të re që parashikon rritje të përvitshme progresive. Sipas kësaj skeme, rritja e bërë në janar do të dyfishohet në vitin 2027, do të trefishohet në 2028, katërfishohet në 2029 dhe pesëfishohet deri në vitin 2030.
Një element i ri është edhe krijimi i një kolone shtesë pensionale, ku qytetarët mund të kontribuojnë vullnetarisht, ndërsa shteti apo punëdhënësi do të japë një kontribut të barabartë. Ky mekanizëm synon krijimin e një fondi individual për siguri më të madhe financiare në moshën e tretë.
Kreu i qeverisë e cilësoi këtë paketë si një hap drejt rritjes reale të të ardhurave dhe një përpjekje për ta bërë ekonominë më të qëndrueshme për qytetarët.
