Kryeministri Edi Rama ka zhvilluar pasditen e sotme pritjen tradicionale të fundvitit me trupin diplomatik, në ambientet e Kryeministrisë. Me këtë rast, kreu i qeverisë ka ndarë në rrjetet sociale një videokartolinë nga mbrëmja festive, duke përcjellë urimet e tij për Vitin e Ri.
Në darkën e fundvitit ishin të pranishëm përfaqësues të misioneve diplomatike në vend, mes tyre ambasadori i Bashkimit Evropian në Shqipëri Silvio Gonzato, si dhe figura të larta institucionale, përfshirë ministrin e Turizmit, Kulturës dhe Sporteve Blendi Gonxhja, kryetarin e Kuvendit Niko Peleshi dhe ministren e Punëve të Jashtme Elisa Spiropali.
Gjatë fjalës së tij, Rama ngriti një dolli për shëndetin dhe mirëqenien e diplomatëve dhe familjeve të tyre, duke i falënderuar për bashkëpunimin dhe kontributin gjatë vitit që po mbyllet.
“Ju lutem të më lejoni ta ngre këtë dolli për shëndetin e mirë dhe harmoninë në familjet tuaja, si dhe për t’ju falënderuar secilin prej jush për gjithçka që keni bërë”, u shpreh Kryeministri.
Në postimin shoqërues të videokartolinës, Rama theksoi mesazhin e tij duke shkruar: “Krenar për Shqipërinë”, duke e cilësuar mbrëmjen si një moment reflektimi dhe mirënjohjeje për marrëdhëniet diplomatike dhe bashkëpunimin ndërkombëtar.
