Kryeministri i Shqipërisë, Edi Rama, ka bërë ndryshime në kabinetin qeveritar pas largimit të Belinda Ballukut nga posti i zëvendëskryeministres dhe ministres së Infrastrukturës dhe Energjisë, pas vendimit të Gjykatës Kushtetuese që la në fuqi pezullimin e saj.
Në kuadër të riformatimit të qeverisë, Albana Koçiu është emëruar zëvendëskryeministre, ndërsa drejtimin e Ministrisë së Infrastrukturës dhe Energjisë e merr Enea Karakaçi, ish-drejtor i OSHEE-së.
Ndryshime ka edhe në disa ministri të tjera. Besfort Lamallari është emëruar ministër i Brendshëm, ndërsa Toni Gogu merr drejtimin e Ministrisë së Drejtësisë. Në krye të Ministrisë së Jashtme është vendosur diplomati Ferit Hoxha, ndërsa Ermal Nufi do të drejtojë Ministrinë e Mbrojtjes.
Po ashtu, Eriona Ismaili është emëruar ministre për Marrëdhëniet me Parlamentin.
Nga kabineti qeveritar janë larguar Elisa Spiropali dhe Pirro Vengu, ndërsa këto lëvizje vijnë vetëm pak muaj pas fillimit të mandatit të ri të qeverisë së Ramës.
