Kryeministri Edi Rama u ka bërë thirrje ambasadorëve shqiptarë në botë që të marrin rol më aktiv në identifikimin dhe regjistrimin e profesionistëve shqiptarë të suksesshëm jashtë vendit.
Në fjalën e mbajtur gjatë Konferencës së Ambasadorëve “DIPLO2025”, kreu i qeverisë theksoi se është e papranueshme që Shqipëria, si një vend i vogël, të mos ketë një databazë të përditësuar me burimet njerëzore të diasporës.
“Jemi një vend i vogël dhe popull i vogël që nuk e kemi luksin të mos kemi dijeni për shqiptarët tanë jashtë vendit. Ka profesionistë të jashtëzakonshëm që shkëlqejnë në çdo cep të botës, të cilët nuk kanë nevojë materiale nga Shqipëria, por do ta mirëprisnin një ftesë për të kontribuar për vendin e tyre,” – u shpreh Rama.
Ai theksoi se shërbimi diplomatik duhet të garantojë këtë njohje, duke e konsideruar ngritjen e një databaze të profesionistëve shqiptarë si domosdoshmëri për ndërtimin e urave të bashkëpunimit me diasporën.
Kryeministri u ndal edhe te çështja e pjesëmarrjes së shqiptarëve që jetojnë jashtë në zgjedhjet e vendit, duke e cilësuar si një mundësi për të forcuar jo vetëm rolin e tyre në vendimmarrje, por edhe përgjegjësinë e shtetit ndaj tyre.
Gjithashtu, Rama nënvizoi rëndësinë e ngritjes së Akademisë Diplomatike sipas modeleve më të mira europiane dhe reformimin normativ të shërbimit të jashtëm, për të garantuar edukim të vazhdueshëm dhe përmirësim sistematik të burimeve njerëzore.
