Kryeministri Edi Rama ka shpallur një lajm të rëndësishëm për turizmin në Shqipëri, duke njoftuar se Korça do të ketë qendrën e parë turistike për skijim në vend. Rama ka zgjedhur “Parisin e vogël” për të kaluar fundjavën dhe për të bërë këtë njoftim nëpërmjet një videomesazhi në Facebook.
Në videon e tij, kryeministri theksoi se Korça tashmë është një destinacion turistik i njohur, me rreth gjysmë milioni vizitorë që kalojnë të paktën një natë në qytet çdo vit. Ai shtoi se me hapjen e qendrës turistike të skive, Korça do të vendoset në hartën europiane të turizmit të skive.
“Ky projekt do ta fusë Korçën në hartën europiane të turizmit të skive dhe do të ndezë një motor të ri me shumë kuaj fuqi në ekonominë e të gjithë qarkut”, u shpreh Rama, duke vënë në dukje se investimet infrastrukturore dhe zhvillimi i turizmit po japin rezultate të dukshme.
Kryeministri vlerësoi gjithashtu zhvillimet e tjera në këtë zonë, si rinovimin e lidhjeve rrugore me Kolonjën dhe Përmetin, të cilat, sipas tij, kanë shtuar vlerën e paketës turistike të kësaj zone.
“Në këtë dimër, 160 bujtina janë plot me turistë çdo fundjavë, dhe ky numër do të rritet edhe më shumë me hapjen e qendrës për skijim”, tha Rama, duke theksuar se vetëm një dekadë më parë, Korça kishte shumë pak vizitorë të huaj dhe bujtinat ishin të pakta.
Kryeministri mbylli mesazhin e tij duke u shprehur optimist për të ardhmen e Korçës dhe të gjithë Shqipërisë, duke theksuar se zhvillimet pozitive janë vetëm fillimi për këtë rajon të vendit.
