Misioni i Vëzhgimit të Zgjedhjeve të Bashkimit Evropian ka prezantuar raportin përfundimtar mbi zgjedhjet parlamentare në Kosovë, duke theksuar se procesi zgjedhor është përballur me sfida të shumta, përfshirë përpjekjet për ndërhyrje nga jashtë.
Anëtarja e Parlamentit Evropian, Natalie Loiseau, e cila udhëhoqi misionin e vëzhgimit, theksoi se një ndërhyrje e tillë ka ardhur nga shteti i Serbisë, një zhvillim që ajo e cilësoi si të papranueshëm ndërmjet vendeve fqinje. Loiseau përmendi gjithashtu nevojën për përmirësimin e transmetimeve publike dhe aksesit në informacion për komunitetet joshumicë në Kosovë.
Në raportin përfundimtar, u paraqitën gjithsej 19 rekomandime për përmirësimin e proceseve zgjedhore në të ardhmen. Loiseau falënderoi qytetarët e Kosovës për angazhimin e tyre në procesin demokratik dhe shprehu mirënjohjen për bashkëpunimin e institucioneve zgjedhore. Ajo po ashtu theksoi angazhimin e 104 vëzhguesve nga 27 shtetet anëtare të BE-së, si dhe nga Kanadaja, Norvegjia dhe Zvicra, të cilët kanë monitoruar procesin gjatë gjithë periudhës zgjedhore.
Loiseau gjithashtu theksoi rëndësinë e përmirësimit të proceseve zgjedhore në të ardhmen, duke nënvizuar që ky raport është një kontribut për forcimin e demokracisë në Kosovë.
