Agjencia e Menaxhimit Emergjent ka bërë të ditur se gjatë ditës së sotme janë regjistruar gjithsej 57 vatra zjarri në nivel vendi, sipas të dhënave nga Qendrat Operative Regjionale 112. Nga këto, 55 vatra janë lokalizuar falë ndërhyrjes së Njësive Profesionale të Zjarrfikjes dhe Shpëtimit, ndërsa dy vatra mbeten ende aktive.
Situata më e rëndë është shënuar në lagjen “Pajtimi” të Komunës së Shtimes, ku zjarri ka marrë përmasa të mëdha dhe ka paraqitur rrezik serioz për qytetarët. Disa persona janë detyruar të marrin trajtim mjekësor si pasojë e ekspozimit ndaj tymit.
Agjencia apelon tek qytetarët që të tregojnë kujdes maksimal, të shmangin veprimet që mund të shkaktojnë zjarr dhe të denoncojnë rastet e zjarrvënieve të qëllimshme pranë organeve ligjzbatuese. Gjithashtu, qytetarët ftohen që të raportojnë rastet emergjente në numrat 112, 193 dhe 192.
Ky lajm tregon se rreziku nga zjarret vazhdon të jetë i lartë dhe kërkon mobilizim të vazhdueshëm të autoriteteve dhe përgjegjësi të qytetarëve.
