Kryeministri i Kosovës dhe kryetari i Lëvizjes Vetëvendosje, Albin Kurti, dyshohet se i ka ofruar presidentes aktuale Vjosa Osmani një post në Qeveri gjatë negociatave për zgjedhjen e presidentit të ri.
Sipas raportimeve mediatike, Kurti thuhet se i ka propozuar Osmanit që të marrë postin e ministres së Arsimit në qeverinë e tij.
Lajmi u raportua fillimisht nga gazetari Ermal Panduri në RTV Dukagjini, duke u thirrur në burime të afërta me palët.
Sipas këtij raportimi, Kurti i ka thënë Osmanit se nëse ajo “performon mirë” në këtë pozitë, mund të emërohet më pas edhe ministre e Punëve të Jashtme.
Ndërkohë, Lëvizja Vetëvendosje ka vendosur të mos e mbështesë Osmanin për një mandat tjetër në krye të shtetit.
Të mërkurën, partia në pushtet ka bërë të ditur se për postin e presidentit do të propozojë ministrin aktual të Punëve të Jashtme, Glauk Konjufca.
Këto zhvillime po ndodhin në një kohë kur skena politike në Kosovë është përfshirë nga diskutime dhe tensione rreth procesit të zgjedhjes së presidentit të ri të vendit.
