Një rast i rëndë i dhunës seksuale është raportuar së fundmi në qytetin e Gjilanit, ku një grua ka denoncuar në Polici se është detyruar të kryejë marrëdhënie seksuale pa pëlqimin e saj. Ngjarja, e cila hedh dritë mbi një tjetër episod tronditës të dhunës me bazë gjinore, është bërë e ditur, duke iu referuar burimeve brenda sistemit të drejtësisë.
Sipas raportimit, rreth orës 13:40 të datës 18 korrik, viktima ka telefonuar Policinë nga një lokal në sheshin qendror të Gjilanit, duke raportuar kërcënime të vazhdueshme nga një person i njohur për të. Njësitet policore kanë reaguar menjëherë, duke shoqëruar viktimën dhe të dyshuarin, Flojrim Sacipi, 38-vjeçar nga fshati Lotovicë i Bujanocit, në Stacionin Policor të Gjilanit.
Gjatë intervistimit, gruaja ka deklaruar se ishte detyruar të takohej me të dyshuarin më 11 korrik 2025 në motelin “Grande” në fshatin Livoq i Ulët, për shkak të presionit dhe kërcënimeve që kishte marrë nga ai. Ajo ka thënë se në këtë takim, Sacipi ka kryer marrëdhënie seksuale pa pëlqimin e saj.
Në deklaratën e dhënë në prani të avokatit të tij mbrojtës, i dyshuari i ka mohuar të gjitha akuzat. Megjithatë, Prokurori i Shtetit ka iniciuar hetimet nën veprën penale “Dhunim”, sipas nenit 227 të Kodit Penal të Republikës së Kosovës dhe ka urdhëruar ndalimin e të dyshuarit për 48 orë.
Policia ka konfirmuar se hetimet janë ende në zhvillim dhe se janë duke u mbledhur prova të tjera për zbardhjen e plotë të ngjarjes.
Burimi: Gazeta Sinjali
