Kontaktet diplomatike mes Rusisë dhe Ukrainës po përjetojnë një zhvillim të ri, me sinjale pozitive për mbajtjen e një raundi të tretë bisedimesh të drejtpërdrejta mes dy palëve. Lajmi është bërë i ditur nga një burim diplomatik për agjencinë shtetërore ruse TASS, i cili konfirmon ekzistencën e një “mirëkuptimi paraprak” për rifillimin e dialogut.
“Ekziston një mirëkuptim i tillë. Data do të përcaktohet,” deklaroi burimi, pa dhënë hollësi për vendin apo formatin e mundshëm të takimit të ardhshëm.
Kremlini kërkon qëndrim të qartë nga Ukraina
Ndërkohë, Kremlini ka konfirmuar se po pret një qëndrim zyrtar nga Kievi për të përcaktuar gatishmërinë për dialog dhe për të vendosur një datë konkrete të takimit. Zëdhënësi i presidencës ruse, Dmitry Peskov, njoftoi se kontaktet mes palëve mbeten aktive dhe po zhvillohen nëpërmjet këshilltarit të presidentit rus, Vladimir Medinsky, i cili vijon të shërbejë si ndërmjetës kryesor në negociata.
“Ne mbajmë kontakte përmes vijës Medinsky me homologun tonë ukrainas,” deklaroi Peskov, duke shtuar se Rusia nuk e lidh mungesën e përgjigjes nga Kievi me ndonjë ndikim nga vendet perëndimore.
Bilanci i raundit të dytë
Raundi i dytë i bisedimeve mes dy vendeve u mbajt në fillim të qershorit dhe solli disa rezultate konkrete në planin humanitar. Palët ranë dakord për shkëmbimin e të burgosurve të plagosur rëndë, si dhe për rikthimin e trupave të ushtarëve të vrarë. Sipas burimeve zyrtare ruse, mijëra trupa të ushtarëve ukrainas janë dorëzuar autoriteteve të Kievit në kuadër të këtij procesi.
Megjithatë, çështjet politike dhe ushtarake kryesore mbeten ende të pazgjidhura, ndërsa sytë e komunitetit ndërkombëtar janë tani të kthyer nga raundi i tretë i bisedimeve – që pritet të jetë një provë serioze për mundësitë reale të paqes.
