Fondi për të Drejtën Humanitare ka reaguar ashpër ndaj ekspozitës së shfaqur në Prishtinë për masakrat e luftës në Kosovë, duke e cilësuar përmbajtjen e saj si të pasaktë dhe problematike.
Sipas këtij institucioni, të dhënat e prezantuara nuk janë çështje interpretimi, por tregojnë “mungesë elementare të njohurive” mbi të drejtën ndërkombëtare humanitare dhe faktet e vërtetuara në gjykata.
Kundërshtimi për Masakrën e Dubravës
Në reagim theksohet se në Masakrën e Dubravës nuk janë vrarë persona të armatosur, siç pretendohet në ekspozitë.
Sipas Fondit, viktimat ishin të burgosur shqiptarë të privuar nga liria dhe nën kontroll të plotë të autoriteteve serbe, duke i cilësuar ata si persona të mbrojtur sipas Konventave të Gjenevës.
“Statusi i tyre i mëparshëm nuk e ndryshon faktin se në momentin e vrasjes nuk ishin luftëtarë”, thuhet në reagim.
Akuza për deformim të fakteve
Fondi e ka cilësuar shqetësuese edhe përpjekjen për t’ia atribuar këto të dhëna vetë institucionit, duke e parë këtë si përpjekje për të diskredituar një nga burimet kryesore të dokumentimit të viktimave të luftës në Kosovë.
Ekspozita në fjalë ka shkaktuar reagime të shumta publike dhe institucionale ditët e fundit, duke hapur debat të gjerë mbi mënyrën e trajtimit të historisë dhe përgjegjësinë për paraqitjen e saktë të ngjarjeve të luftës.
