Një vajzë 21-vjeçare është shpëtuar nga Policia e Kosovës në momentet e fundit, pasi tentoi të hidhej nga ballkoni i katit të katërt në një kompleks banesor në Ferizaj.
Ngjarja ndodhi sot herët në mëngjes, rreth orës 04:30, kur qytetarët njoftuan policinë për rastin. Menjëherë, patrullat policore shkuan në vendngjarje dhe pas komunikimit me dëshmitarët, vërejtën të renë në anën e jashtme të ballkonit.
Njëri nga policët, për shkak të rrezikut të lartë, u detyrua të hapte derën e banesës me forcë dhe të ndërhynte me shpejtësi, duke e kapur vajzën dhe, me ndihmën e një kolegu tjetër, e tërhoqi brenda rrethojave të ballkonit.
Në vendngjarje mbërriti edhe ekipi i emergjencës, i cili i dha ndihmën e parë 21-vjeçares që ndodhej në gjendje të rënduar psikike dhe emocionale. Ajo u dërgua fillimisht në Qendrën Emergjente në Ferizaj, e më pas u transferua për trajtim të mëtejshëm në QKUK në Prishtinë.
Familjarët e saj janë njoftuar menjëherë pas incidentit. Policia e Kosovës ka theksuar se mbetet e përkushtuar në mbrojtjen e jetës së qytetarëve dhe apeloi tek qytetarët që të raportojnë raste të ngjashme për të parandaluar tragjeditë.
