Kryetari i Partisë Demokratike të Kosovës, Memli Krasniqi, ka reaguar pas zhvillimeve të fundit në Qendrën e Numërimit dhe Rezultateve në Mitrovicë, ku Prokuroria ka ndërhyrë për të hetuar dyshimet për manipulim me vota.
Krasniqi ka thënë se PDK tashmë ka ndërmarrë të gjitha hapat për të mbrojtur, siç u shpreh ai, vullnetin e qytetarëve, ndërsa ka paralajmëruar se partia do të dorëzojë edhe ankesën zyrtare në Panelin Zgjedhor për Ankesa dhe Parashtresa brenda afatit ligjor.
“Shqetësimet e paraqitura janë serioze dhe, si të tilla, po i adresojmë në të gjitha instancat dhe adresat përkatëse. Sot PDK do të dorëzojë edhe ankesën e saj zyrtare në PZAP,” shkroi Krasniqi në Facebook.
Ai theksoi se integriteti i votës duhet të garantohet dhe se procesi duhet të zhvillohet me transparencë dhe në përputhje të plotë me ligjin.
“Pa paragjykuar rezultatin përfundimtar, PDK kërkon që çdo procedurë të trajtohet me transparencë, drejtësi dhe në përputhje me ligjin, në mënyrë që besimi i qytetarëve në procesin zgjedhor të mbetet i plotë. Vota është e shenjtë në demokraci dhe PDK është e vendosur ta mbrojë integritetin e zgjedhjeve dhe vullnetin e vërtetë të votuesve,” deklaroi ai.
Krasniqi njoftoi se në orën 12:00 PDK do të mbajë konferencë për media, ku priten detaje shtesë për zhvillimet në Mitrovicë dhe hapat e mëtejshëm të partisë.
