Dhomat e Specializuara në Hagë kanë refuzuar sërish kërkesat për lirimin e përkohshëm të tre ish-krerëve të Ushtrisë Çlirimtare të Kosovës – Kadri Veselit, Rexhep Selimit dhe Jakup Krasniqit – duke vazhduar masën e paraburgimit për nga dy muaj secilit prej tyre.
Gjykata ka vendosur që masa e paraburgimit të mbetet në fuqi, me arsyetimin se ekziston rreziku për pengim të drejtësisë dhe ndikim mbi dëshmitarët, edhe pse nuk ka prova për rrezik arratisjeje.
Thaçi nuk kërkoi lirim – masa i vazhdohet automatikisht
Në të njëjtën kohë, Hashim Thaçit – ish-president i Kosovës – i është vazhduar paraburgimi, megjithëse ai nuk ka paraqitur kërkesë për lirim të përkohshëm.
Sipas trupit gjykues, pavarësisht mungesës së provave për tentativë arratisjeje, mbetet shqetësimi se të pandehurit mund të ndikojnë në dëshmitarët ose të ndërhyjnë në procedurat gjyqësore, për shkak të pozicionit dhe ndikimit që kanë pasur ose mund të kenë.
Reagimi i mbrojtjes: “Vendim paragjykues dhe pa bazë”
Avokati Ardian Bajraktari, njëri nga përfaqësuesit ligjorë të mbrojtjes, e cilëson këtë vendim si të padrejtë dhe të pabazuar, duke theksuar se janë plotësuar të gjitha kushtet ligjore për zëvendësimin e paraburgimit me një masë më të butë.
“Ata kanë dëshmuar gatishmërinë për t’iu përgjigjur çdo ftese nga Gjykata. Për më tepër, është përfunduar dëgjimi i listës së dëshmitarëve të Prokurorisë”, tha Bajraktari.
Ai shton se refuzimi i kërkesës së mbrojtjes është i pabazuar ligjërisht dhe në kundërshtim me praktikën e Gjykatës Evropiane për të Drejtat e Njeriut, që sipas tij duhet të ndiqet edhe nga Dhomat e Specializuara në Hagë.
Ish-krerët e UÇK-së ndodhen në paraburgim në Hagë që prej vitit 2020, të akuzuar për krime lufte dhe krime kundër njerëzimit. Procesi gjyqësor ka hyrë në një fazë të avancuar, ku shumica e dëshmitarëve të thirrur nga Prokuroria tashmë kanë dhënë dëshmitë e tyre.
Megjithatë, gjykata vazhdon të vlerësojë se rreziku për ndërhyrje në procesin gjyqësor nuk është eliminuar, çka e justifikon, sipas saj, mbajtjen në paraburgim të të akuzuarve.
Ky vendim pritet të vazhdojë të ngjallë debate të ashpra në opinionin publik dhe në skenën politike në Kosovë, ku Dhomat e Specializuara mbeten subjekt i kritikave të shumta për trajtim të pabarabartë dhe vonesa në proces.
