Presidenti amerikan Donald Trump do të presë të martën Princin e Kurorës së Arabisë Saudite, Mohammed bin Salman, në një vizitë të nivelit të lartë që synon të thellojë partneritetin strategjik midis dy vendeve. Princit, i cili kërkon të përforcojë imazhin e tij ndërkombëtar pas vrasjes së gazetarit Jamal Khashoggi në vitin 2018, do t’i shtrohet tapeti i kuq në Shtëpinë e Bardhë, në vizitën e tij të parë atje në më shumë se shtatë vjet.
Takimi pritet të prodhojë marrëveshje madhore sigurie, projekte të energjisë bërthamore civile dhe paketa investimesh me vlerë dhjetëra miliarda dollarë. Administrata amerikane pret të konfirmojë një angazhim prej 600 miliardë dollarësh investime saudite në SHBA, pjesë e të cilave do të përfshijnë projekte të teknologjisë dhe inteligjencës artificiale.
Një nga zhvillimet më të rëndësishme është vendosmëria e Trump për t’i shitur Arabisë Saudite avionët e avancuar F-35, duke e bërë mbretërinë vendin e parë në Lindjen e Mesme pas Izraelit që merr akses në këtë kapacitet ushtarak. Lëvizja konsiderohet ndryshim i madh gjeopolitik që mund të rikthejë ekuilibrat e rajonit.
Nga ana saudite, Mohammed bin Salman kërkon garanci të reja sigurie nga SHBA. Trump pritet të lëshojë një urdhër ekzekutiv që do të vendosë themelet e një pakti mbrojtës të ngjashëm me atë që SHBA i ka dhënë Katarit, megjithëse ende larg një traktati të formësuar të tipit NATO që Riadi ka kërkuar fillimisht.
Zyrtarë amerikanë thonë se Trump është i vendosur të mbajë Arabinë Saudite sa më larg sferës së ndikimit të Kinës, duke lidhur Riadin me SHBA-në në fusha si siguria, financat, energjia dhe inteligjenca artificiale. Sipas ish-negociatorit Dennis Ross, objektivi i Trump është që çdo shtyllë strategjike saudite të jetë e ankoruar te Uashingtoni dhe jo te Pekini.
Trump do të nxisë gjithashtu Arabinë Saudite të bashkohet me Marrëveshjet e Abrahamit dhe të normalizojë marrëdhëniet me Izraelin. Megjithatë, Riadi ka bërë të qartë se nuk lëviz pa një rrugë të qartë drejt shtetësisë palestineze, një temë që është shtyrë në plan të dytë nga kriza në Gaza. Analistët vlerësojnë se mungesa e progresit në normalizimin me Izraelin nuk do të pengojë SHBA-në dhe Arabinë Saudite të arrijnë një pakt të ri sigurie.
Gjatë vizitës, bin Salman do të zhvillojë takime në Zyrën Ovale, do të marrë pjesë në një drekë zyrtare në Sallën e Kabinetit dhe do të mbyllë ditën me një darkë shtetërore në Shtëpinë e Bardhë. Kjo vizitë konsiderohet si shenja më e qartë se marrëdhëniet mes Uashingtonit dhe Riadit janë rikuperuar plotësisht nga tensionet e shkaktuara pas vrasjes së Khashoggit.
