Komisioni Qendror i Zgjedhjeve ka bërë të ditur se procesi i rinumërimit të votave po vijon me ritëm të përshpejtuar, duke arritur tashmë në 65 për qind të vendvotimeve të përfshira në vendimin për rinumërim.
Sipas njoftimit zyrtar, deri të dielën më 25 janar 2026, ora 16:00, në Qendrën e Numërimit dhe Rezultateve janë rinumëruar 1,662 nga 2,557 vendvotime.
“Kjo procedurë po zhvillohet sipas listës së vendvotimeve për të cilat KQZ ka marrë vendim për rinumërim. Procesi ka nisur më 13 janar 2026 dhe po vazhdon pa ndërprerje,” thuhet në njoftim.
KQZ ka sqaruar se rezultatet e çdo vendvotimi publikohen menjëherë pas përfundimit të rinumërimit në platformën zyrtare të rezultateve, në seksionin QNR > Rinumërim, duke garantuar transparencë të plotë për publikun dhe subjektet politike.
Procesi i rinumërimit pritet të vazhdojë edhe në ditët në vijim, deri në përmbylljen e plotë të të gjitha vendvotimeve të parapara.
