Cristiano Ronaldo ishte një nga të ftuarit specialë në darkën zyrtare të mbajtur në Shtëpinë e Bardhë për nder të udhëheqësit de facto të Arabisë Saudite, Mohammed bin Salman, raportoi BBC.
Prania e Ronaldos në këtë event nuk kaloi pa vëmendje. Ish-presidenti Donald Trump, i cili e mikpriti darkën, e quajti “nder” që priste futbollistin, duke e lidhur rolin e tij në ligën saudite me imazhin e ri që Mohammed bin Salman po përpiqet t’i japë vendit.
Arabia Saudite synon të zvogëlojë varësinë nga nafta dhe të zgjerohet në fusha si sporti, turizmi dhe teknologjia, ku Ronaldo është bërë një nga fytyrat kryesore të këtij projekti të modernizimit.
Një zyrtar i Shtëpisë së Bardhë konfirmoi praninë e CR7, por pa dhënë detaje nëse ai ishte pjesë e delegacionit zyrtar të princit saudit.
Gjatë fjalimit të tij, Trump u ndal te marrëdhëniet e ngushta me Arabinë Saudite, duke e quajtur vendin një “aleat të madh jo-NATO”. Ai nuk ngurroi të përmendte as momentin personal me Ronaldon, duke treguar para të ftuarve se djali i tij, Barron, është tifoz i flaktë i yllit portugez:
“Barroni pati mundësinë ta takojë dhe besoj se tani më respekton pak më shumë, pasi ia prezantova Ronaldon,” tha ai mes duartrokitjeve të të pranishmëve.
Eventi u pa si një tjetër shenjë e afrimit mes Uashingtonit dhe Riadit, ku sporti po luan rol të dukshëm në diplomacinë moderne saudite.
