E premtja në Kosovë ka nisur me reshje lokale shiu, të cilat janë regjistruar gjatë natës dhe në orët e para të mëngjesit, veçanërisht në rajonin e Dukagjinit dhe Drenicës. Reshjet kanë qenë të përqendruara në zona të izoluara dhe kanë pasur karakter të përkohshëm.
Gjatë ditës së sotme pritet të mbajë mot pjesërisht me diell dhe me vranësira lokale. Megjithatë, nuk përjashtohen zhvillimet e rrebesheve afatshkurtra të shiut, të cilat mund të shoqërohen me vetëtima dhe bubullimë, kryesisht në zonat kodrinore-malore të vendit.
Instituti Hidrometeorologjik i Kosovës ka paralajmëruar edhe depërtimin e një fronti të dobët të ajrit të ftohtë, i cili pritet të ndikojë në krijimin e kushteve për rrebeshe lokale dhe dukuri elektrike atmosferike, pa përfshirë tërësisht gjithë territorin.
Qytetarëve u rekomandohet kujdes gjatë orëve të pasdites për shkak të mundësisë së reshjeve të befasishme dhe kushteve të paqëndrueshme atmosferike.
