Tensionet mes Shtetet e Bashkuara të Amerikës dhe Iranit janë rritur ndjeshëm, ndërsa Uashingtoni ka autorizuar largimin e punonjësve jo-thelbësorë të qeverisë amerikane dhe familjeve të tyre nga Izraeli, duke paralajmëruar qytetarët amerikanë që të konsiderojnë largimin sa më shpejt nga vendi.
Departamenti amerikan i Shtetit u bëri thirrje qytetarëve të shmangin udhëtimet drejt Izraelit dhe të largohen përderisa fluturimet komerciale janë ende të disponueshme. Paralajmërimi erdhi pas përfundimit pa rezultat të bisedimeve bërthamore mes dy vendeve në Gjenevë.
Ndërkohë, presidenti amerikan Donald Trump ka vendosur dy grupe sulmi me aeroplanmbajtëse në rajon, të gatshme për veprim në rast se Teherani nuk tregon gatishmëri për të ndalur aktivitetet e tij bërthamore.
Ambasadori amerikan në Izrael, Mike Huckabee, i ka dërguar një mesazh stafit të ambasadës duke i inkurajuar ata që dëshirojnë të largohen të rezervojnë menjëherë fluturimet e para të disponueshme.
Situata është komplikuar edhe më tej pasi Mbretëria e Bashkuar ka tërhequr përkohësisht stafin nga ambasada e saj në Teheran për shkak të rreziqeve të sigurisë.
Në përpjekje për të shmangur një përshkallëzim ushtarak, ministri i Jashtëm i Omanit, Badr Albusaidi, ka udhëtuar drejt Uashingtonit për të ndërmjetësuar mes palëve dhe për të bindur administratën amerikane që të vazhdojë rrugën diplomatike.
Megjithatë, dallimet mes dy vendeve mbeten të mëdha. SHBA kërkon që Irani të shkatërrojë disa nga instalacionet kryesore bërthamore dhe të dorëzojë rezervat e uraniumit të pasuruar, ndërsa Teherani këmbëngul në të drejtën e tij për pasurimin e uraniumit brenda territorit të vet.
Sipas raportit të Agjencia Ndërkombëtare për Energjinë Atomike (IAEA), ende nuk dihet vendndodhja e rreth 400 kilogramëve uranium të pasuruar në nivel të lartë brenda Iranit, çka ka shtuar shqetësimet ndërkombëtare.
Dy palët pritet të zhvillojnë një raund të ri bisedimesh teknike javën e ardhshme në Vjenë, në përpjekje për të shmangur përshkallëzimin e mëtejshëm të krizës.
