Sekretari i Shtetit i SHBA-së, Marco Rubio, ka përsëritur paralajmërimin se Shtetet e Bashkuara mund të tërhiqen nga ndërmjetësimi në bisedimet për paqe mes Rusisë dhe Ukrainës, nëse palët nuk paraqesin propozime konkrete për përfundimin e konfliktit.
Gjatë një deklarate të martën, Rubio theksoi se “tani është koha që të dyja palët të ofrojnë zgjidhje reale dhe të matshme për paqen”. Sipas zëdhënëses së Departamentit të Shtetit, Tammy Bruce, SHBA-të nuk do të mbështesin më procesin e negociatave nëse nuk ka përparim të dukshëm. Ajo shtoi se vendimi përfundimtar për këtë çështje do të merret nga Presidenti Donald Trump.
Ky paralajmërim vjen pas njoftimit të Presidentit rus, Vladimir Putin, për një armëpushim tre-ditor që do të përkonte me 80-vjetorin e fitores së Bashkimit Sovjetik ndaj Gjermanisë naziste dhe paradën përkatëse në Moskë më 9 maj. Megjithatë, SHBA-të nuk e shohin këtë si një hap domethënës drejt paqes.
“Nuk kemi nevojë për një armëpushim simbolik tre-ditor, por për një marrëveshje të plotë, të përhershme dhe të qëndrueshme për t’i dhënë fund luftës”, u shpreh Bruce.
Ndërkohë, Presidenti Trump ka kritikuar së fundmi Presidentin ukrainas Volodymyr Zelensky për refuzimin e dorëzimit të gadishullit të Krimesë, që Rusia e aneksoi në vitin 2014.
Nga ana tjetër, senatorja demokrate Jeanne Shaheen, anëtare e lartë në Komitetin për Marrëdhënie me Jashtë të Senatit, paralajmëroi se njohja e aneksimit të paligjshëm të Krimesë nga Rusia do të inkurajonte më shumë agresion nga Moska dhe ndoshta edhe nga Pekini. Ajo kritikoi Presidentin Trump për mënyrën e menaxhimit të negociatave, duke e akuzuar se ka bërë lëshime të njëanshme ndaj Rusisë dhe ka minuar unitetin me aleatët ndërkombëtarë.
