Sekretari Amerikan i Shtetit, Marco Rubio, ka shprehur skepticizëm të thellë lidhur me mundësinë e arritjes së një marrëveshjeje paqeje mes Ukrainës dhe Rusisë, gjatë bisedimeve që po zhvillohen në Turqi.
Rubio, i cili po udhëton nga Antalia drejt Stambollit për takime me zyrtarë të lartë turq dhe ukrainas, u shpreh pas një mbledhjeje të ministrave të jashtëm të NATO-s se nuk ka pritshmëri të larta për përparim diplomatik në këto negociata.
“Dua të jem i sinqertë, nuk kemi pritshmëri të larta për atë që do të ndodhë nesër. Dhe sinqerisht, në këtë pikë është shumë e qartë se e vetmja mënyrë për përparim është midis Presidentit Trump dhe Presidentit Putin,” – deklaroi Rubio.
Ai theksoi se nuk pret rezultate konkrete nga takimet aktuale dhe nënvizoi nevojën për një dialog të drejtpërdrejtë dhe të sinqertë mes palëve, një qasje që sipas tij, Presidenti Trump është i gatshëm ta ndërmarrë.
“Nuk besoj se ndonjë gjë produktive do të ndodhë nga kjo pikë e tutje. Ukraina dhe Rusia duhet të angazhohen në një bisedë të sinqertë, të cilën Trump është i gatshëm ta bëjë,” – shtoi Rubio.
Deklaratat e Rubio-s vijnë në një moment të ndjeshëm diplomatik, teksa përpjekjet ndërkombëtare për t’i dhënë fund konfliktit ruso-ukrainas përballen me pengesa serioze dhe mungesë konsensusi mes aktorëve globalë.
