Aplikacioni popullor i mesazheve WhatsApp mund të përballet me bllokim të afërt në Rusi, pasi autoritetet shtetërore po ashpërsojnë masat ndaj platformave digjitale që lidhen me “shtete armiqësore”. Paralajmërimi erdhi nga Anton Gorelkin, zëvendëskryetar i Komitetit për Politika të Informacionit në Dumen Shtetërore, përmes një postimi në Telegram.
“Është koha që WhatsApp të përgatitet për t’u larguar nga tregu rus,” deklaroi Gorelkin, duke theksuar se aplikacioni në pronësi të kompanisë Meta pritet të përfshihet në listën e platformave të ndaluara.
Ky vendim është në vazhdën e një kursi përshkallëzues të censurës digjitale në Rusi, veçanërisht pas nisjes së luftës në Ukrainë më 2022. Që nga ajo kohë, Moska ka shtuar kontrollet ndaj internetit dhe mediave, duke ndaluar qasjen në një sërë platformash perëndimore.
Rusia nisi përpilimin e listës së “shteteve armiqësore” pas një dekreti të nënshkruar nga presidenti Vladimir Putin në vitin 2021, fillimisht duke përfshirë SHBA-në dhe Çekinë, e më pas, me intensifikimin e luftës në Ukrainë, edhe të gjithë Bashkimin Evropian.
Në këtë kontekst, autoritetet ruse kanë njoftuar planet për krijimin e një aplikacioni shtetëror për mesazhe, i cili pritet të quhet “Max”. Ligji për zhvillimin e tij është miratuar në qershor të këtij viti, ndërsa është kërkuar që të gjitha shërbimet publike të përfshihen në të.
Në linjë me këto masa, Parlamenti rus miratoi të enjten një ligj të ri, sipas të cilit qytetarët mund të gjobiten me 64 dollarë nëse kapen duke kërkuar përmbajtje që autoritetet e konsiderojnë si “ekstremiste”. Mes platformave të targetuara për përmbajtje “kundër elitave shtetërore” janë edhe ato që lidhen me Fondacionin kundër Korrupsionit, të themeluar nga lideri i ndjerë i opozitës, Aleksei Navalny.
Deri më tani, në Rusi nuk ka ekzistuar një rregullore që ndalon në mënyrë eksplicite kërkimin e lirë të informacionit në internet, megjithatë, me bllokimin e vazhdueshëm të faqeve të pavarura dhe atyre perëndimore, vendi po i afrohet gjithnjë e më shumë një modeli të kontrolluar të informacionit.
