Rusia ka ndërmarrë një tjetër sulm masiv ndaj infrastrukturës energjetike të Ukrainës, duke shkaktuar dëme të mëdha dhe ndërprerje të energjisë në disa rajone të vendit. Ministrja e Energjisë, Svitlana Grinchuk, njoftoi se “armiku po kryen përsëri një sulm të koordinuar dhe të gjerë”, duke shënjestruar sistemin energjetik ukrainas.
Një seri shpërthimesh tronditën qytetin e Dnipros, i cili u godit rëndë nga dronët rusë gjatë natës. Sipas Administratës Rajonale të Dnipropetrovskut, një nga dronët goditi një ndërtesë banimi, duke shkatërruar disa apartamente dhe duke shkaktuar një zjarr të madh.
Shtatë persona u plagosën, mes tyre dy fëmijë të moshës 2 dhe 13 vjeç, të cilët ndodhen nën kujdes mjekësor.
Zjarre të tjera janë raportuar në distriktin Samarskyi, ndërsa infrastruktura energjetike është dëmtuar rëndë në Synelnykove, dhe shpërthime të forta janë dëgjuar në Pavlohrad, sipas autoriteteve lokale.
Këto sulme vijnë në vazhdën e ofensivës së re të Moskës për të dobësuar furnizimin me energji elektrike të Ukrainës në prag të dimrit, një strategji që Kievi e ka cilësuar si “terrorizëm energjetik” kundër popullsisë civile.
