Sulmet e fundit ruse ndaj rrjetit elektrik të Ukrainës janë bërë më të koordinuara dhe më efektive, pasi Moska ka nisur të përdorë qindra dronë të pajisur me kamera precize, të cilët po mbingarkojnë mbrojtjen ajrore të vendit.
Miliona qytetarë po përgatiten për një dimër të vështirë, me ndërprerje të gjata të energjinë elektrike, ujit dhe ngrohjes.
Analistët thonë se Rusia ka ndryshuar strategjinë e saj, duke kaluar nga sulmet masive ndaj rrjetit kombëtar, në sulme të përqendruara rajonale.
Rajonet Çernihiv, Sumy dhe Poltava janë në shënjestër të vazhdueshme, ndërsa Kharkivi, Odesa, Mykolaivi dhe Dnipro përballen me sulme më të rralla, por të rregullta.
“Ata nuk kanë pasur sukses të shkatërrojnë infrastrukturën kombëtare, sepse ajo tani është shumë më mirë e mbrojtur dhe operatorët dinë si të reagojnë,”
— deklaroi Oleksandr Kharchenko, drejtor i Qendrës së Kërkimeve të Energjisë në Kiev.
Në fillim të tetorit, një sulm rus e la qytetin verior të Shostkës, në rajonin e Sumyt, pa energji elektrike, ujë dhe gaz.
Kryetari i bashkisë, Mykola Noha, konfirmoi se furnizimi po bëhet me orar, dhe se banorët jetojnë në pasiguri të plotë.
“Situata është sfiduese. Ne rregullojmë diçka dhe ajo shkatërrohet sërish,”
— tha Noha.
Në qytet dëgjohet gumëzhima e gjeneratorëve, që furnizojnë spitale, dyqane, kafene dhe ndërtesa banimi.
Në disa zona janë ngritur të ashtuquajturat “pika të pamposhtësisë”, ku banorët mund të ngrohen dhe të karikojnë pajisjet e tyre.
Në ditët më të vështira, kur nuk kishte as gaz dhe as energji, njerëzit gatuanin në rrugë me zjarr të hapur, tregon një infermiere lokale.
Në spitalin e Shostkës, sobat elektrike janë zëvendësuar me një furrë druri, e ndërtuar që në ditët e para të pushtimit rus në vitin 2022.
Sipas infermieres Svitlana Zakotei, ajo përdoret tani për të përgatitur ushqim për rreth 180 pacientë çdo ditë.
Drejtori i spitalit, Oleh Shtohryn, tha se institucioni ka kaluar tre javë duke punuar vetëm me gjeneratorë, që konsumojnë gjysmë toni karburant në ditë – rreth 250 mijë hryvnia (5,100 euro) në javë.
“Energjia është e racionuar. Në repartin e dializës mbajmë dritat të zbehta që makinat e pacientëve të mund të funksionojnë,” tha ai.
Një nga tetë njësitë e dializës u dogj për shkak të ndërprerjeve të energjisë, por spitali vazhdon të trajtojë 23 pacientë në ditë, disa prej të cilëve varen jetikisht nga këto makina.
Për shumë qytetarë, ndërprerjet e energjisë janë çështje mbijetese, jo vetëm shqetësim.
Zinaida Kot, paciente në dializë prej shtatë vjetësh, tha për mediat ukrainase:
“Ne shqetësohemi shumë kur nuk ka energji elektrike. Makina që më mban gjallë ndalon. Nëse nuk ka trajtim, nuk do të ekzistoja.”
Autoritetet paralajmërojnë se sulmet e reja ruse me dronë dhe raketa mund të shkaktojnë valë të re ndërprerjesh energjetike në mbarë vendin gjatë dimrit.
Ndërkohë, qindra mijëra gjeneratorë privatë janë vënë në përdorim, duke u bërë burim i vetëm mbijetese për shumë familje, biznese dhe institucione publike.
Ekspertët thonë se qëllimi i Rusisë nuk është vetëm të shkatërrojë rrjetin elektrik, por të dobësojë rezistencën civile të popullit ukrainas në prag të një dimri tjetër të ftohtë dhe të pasigurt.
