Komentet e fundit të Kremlinit dëshmojnë se diplomacia e shpejtë e administratës Trump ka sjellë pak rezultate. Moska nuk po ndryshon qëndrim lidhur me atë që e konsideron si garanci të pranueshme sigurie për Ukrainën, deklaroi të mërkurën një zyrtar i lartë rus.
Shefi i diplomacisë së Moskës, Sergey Lavrov, në një konferencë për shtyp pas takimit me homologun jordanez, theksoi se Rusia nuk do të pranojë garanci sigurie të hartuara pa pjesëmarrjen e saj.
“Moska do të pajtohet vetëm nëse garancitë e sigurisë për Ukrainën ofrohen në mënyrë të barabartë, me përfshirjen e vendeve si Kina, Shtetet e Bashkuara, Mbretëria e Bashkuar dhe Franca”, u shpreh Lavrov.
Qëndrimet e tij minuan shpresat për ndonjë përparim pas takimit të presidentit rus Vladimir Putin me presidentin amerikan Donald Trump të premten në Alaska. Kremlini, sipas Lavrovit, mbetet i vendosur në kërkesat e tij: që Ukraina të mbetet shtet neutral, të reduktojë ndjeshëm ushtrinë dhe të braktisë aspiratat për anëtarësim në NATO.
Në këtë kuadër, perspektiva e një takimi të drejtpërdrejtë mes Putinit dhe presidentit ukrainas Volodymyr Zelenskyy shihet si e largët. Lavrov rikujtoi një propozim të bisedimeve të paqes në Stamboll në prill 2022, ku u diskutua një koalicion ndërkombëtar për garantimin e sigurisë së Ukrainës, por që dështoi pasi Moska kërkonte të kishte veto në çdo vendim.
“Jam i bindur se në Perëndim – para së gjithash në Shtetet e Bashkuara – e kuptojnë se diskutimi për sigurinë pa Federatën Ruse është një utopi, një rrugë pa krye,” tha Lavrov.
Ai gjithashtu kritikoi kryediplomaten e BE-së, Kaja Kallas, duke i cilësuar deklaratat e saj si “një degradim i metodave të politikës së jashtme”.
Nga ana tjetër, presidenti amerikan Donald Trump i cilësoi takimet e fundit me Putinin, Zelenskyn dhe liderët evropianë si një sukses. Ai u premtoi udhëheqësve evropianë dhe Kievit se Ukraina do të ketë mbrojtje të ngjashme me Nenin 5 të NATO-s, por nuk dha detaje konkrete, duke theksuar se “asnjë trupë amerikane nuk do të jetë në terren në Ukrainë”.
Liderët evropianë mbeten skeptikë për sinqeritetin e Putinit në lidhje me një marrëveshje paqeje, ndërsa komentet e Lavrovit duket se forcojnë këtë mosbesim.
